తాడేపల్లి గూడెం : మాజీ ముఖ్యమంత్రి, వైఎస్సార్సీపీ అధ్యక్షుడు వై.ఎస్. జగన్ మోహన్ రెడ్డిని కలిశారు సీపీఐ బృందం. సెప్టెంబర్ 26న విజయవాడలో జరగనున్న కరువు పరిస్థితులపై రౌండ్ టేబుల్ సమావేశంలో పాల్గొనాల్సిందిగా వారు వైఎస్సార్సీపీని ఆహ్వానించారు. ఈ ప్రతినిధి బృందంలో సీపీఐ రాష్ట్ర కార్యదర్శి జి. ఈశ్వరయ్య, సీనియర్ నాయకులు కె. రామకృష్ణ, జాతీయ కార్యవర్గ సభ్యురాలు అక్కినేని వనజ, రాష్ట్ర కార్యవర్గ సభ్యుడు పి. హరినాథ్ రెడ్డి ఉన్నారు. వైఎస్ జగన్ ఆ నాయకులకు స్వాగతం పలికారు. ప్రజలకు సంబంధించిన వివిధ అంశాలపై వారితో చర్చించారు. ఈ సమావేశంలో వైఎస్సార్సీపీ రాష్ట్ర సమన్వయకర్త సజ్జల రామకృష్ణారెడ్డి కూడా పాల్గొన్నారు. కరువుపై జరగనున్న రౌండ్ టేబుల్ సమావేశానికి వైఎస్ జగన్ను ఈశ్వరయ్య అధికారికంగా ఆహ్వానించారు. సమావేశం అనంతరం మీడియాతో మాట్లాడిన ఈశ్వరయ్య రైతు సంఘాలతో కలిసి సీపీఐ కరువు సమస్యపై పోరాటం చేస్తోందని, ఈ ఉద్యమంలో పాల్గొనాల్సిందిగా వైఎస్ జగన్ను ఆహ్వానించామని తెలిపారు.
ప్రజా సమస్యలపై జరిగే పోరాటాల్లో భాగస్వాములు కావాలన్న అంశంపై వైఎస్ జగన్ సానుకూలంగా స్పందించారని ఆయన పేర్కొన్నారు . రాష్ట్ర వ్యాప్తంగా కరువు పరిస్థితులు తీవ్రంగా ఉన్నాయని ఈశ్వరయ్య అన్నారు. ప్రభుత్వం 65 లక్షల ఎకరాల్లో సాగు జరిగిందని చెబుతున్నప్పటికీ, వాస్తవానికి సుమారు 50 లక్షల ఎకరాల్లో మాత్రమే సాగు జరిగిందని ఆయన చెప్పారు. ఈ పరిస్థితిని జాతీయ విపత్తుగా పరిగణించాలని, రైతులకు ఉపశమనం కల్పించేలా ప్రభుత్వంపై ఒత్తిడి తీసుకు రావాలని ఆయన పిలుపునిచ్చారు. ప్రస్తుతం కురుస్తున్న వర్షాలు భూగర్భ జలమట్టాలను పెంచినప్పటికీ, సాగును పూర్తిగా పునరుద్ధరించలేవని ఆయన అభిప్రాయపడ్డారు. జీవనోపాధి కోసం వలస వెళ్ళిన వారి ఓట్లను తొలగించడాన్ని వ్యతిరేకిస్తూ, ఓటర్ల జాబితా సవరణ విషయంలో కూడా సీపీఐ వైఎస్ జగన్ మద్దతు కోరిందని ఆయన తెలిపారు. డీఎస్సీ అక్రమాలపై సీపీఐ పోరాడుతోందని, నిరసనకారులపై భౌతిక దాడులను వ్యతిరేకిస్తోందని ఈశ్వరయ్య చెప్పారు. సీబీఐ విచారణ జరగాలన్న ప్రతిపక్షాల డిమాండ్కు సీపీఐ మద్దతు ఇస్తుందని పేర్కొన్నారు. నిరసనలకు దాడులతో సమాధానం ఇవ్వడం కాకుండా, లేవనెత్తిన ప్రశ్నలకు ప్రభుత్వం సమాధానం చెప్పాలని ఆయన సూచించారు
