హైదరాబాద్ : రాష్ట్ర ఐటీ, పరిశ్రమల శాఖ మంత్రి శ్రీధర్ బాబు కీలక వ్యాఖ్యలు చేశారు. ‘భారత్ ఫ్యూచర్ సిటీ’లో పెట్టుబడులు పెట్టాలని సింగపూర్ సంస్థలకు పిలుపు ఇచ్చారు. తెలంగాణ సెమీ కండక్టర్ పర్యావరణ వ్యవస్థ అభివృద్ధికి సింగపూర్ సాంకేతిక , పారిశ్రామిక నైపుణ్యం ఎంతో దోహద పడుతుందని మంత్రి పేర్కొన్నారు. బుధవారం హైదరాబాద్లోని డాక్టర్ బి.ఆర్. అంబేద్కర్ తెలంగాణ సచివాలయంలో సింగపూర్ వాణిజ్య , పరిశ్రమల మంత్రిత్వ శాఖకు చెందిన శాశ్వత కార్యదర్శి (ఇంధనం , వాణిజ్యం) అగస్టీన్ లీ నేతృత్వంలోని ఉన్నత స్థాయి సింగపూర్ ప్రతినిధి బృందంతో ఐటీ , పరిశ్రమల శాఖ మంత్రి డి. శ్రీధర్ బాబు సమావేశమయ్యారు. తెలంగాణ ప్రభుత్వం కొత్త పట్టణ , ఆర్థిక వృద్ధి కేంద్రంగా అభివృద్ధి చేస్తున్న “భారత్ ఫ్యూచర్ సిటీ”లో పెట్టుబడి అవకాశాలను పరిశీలించాలని కోరారు.
సింగపూర్ ప్రతినిధి బృందంతో జరిగిన సమావేశంలో ఆయన ఈ విజ్ఞప్తి చేశారు. తెలంగాణ సెమీ కండక్టర్ పర్యావరణ వ్యవస్థ అభివృద్ధికి సింగపూర్ సాంకేతిక, పారిశ్రామిక నైపుణ్యం తోడ్పడుతుందని మంత్రి అన్నారు. సెమీకండక్టర్ తయారీ , అనుబంధ పరిశ్రమలు, సమగ్ర సరఫరా గొలుసు వంటి రంగాల్లో అవకాశాలను పరిశీలించాలని ఆయన సింగపూర్ సంస్థలను ఆహ్వానించారు. అంతర్జాతీయ భాగస్వామ్యాల ద్వారా అధిక విలువ కలిగిన పరిశ్రమలు, పరిశోధన , అభివృద్ధి, సాంకేతిక ఆధారిత సంస్థలకు ప్రధాన కేంద్రంగా తన స్థానాన్ని బలోపేతం చేసుకోవాలని తెలంగాణ లక్ష్యంగా పెట్టుకుందని ఈ సందర్భంగా స్పష్టం చేశారు. ఐటీ , ఐటీ-ఆధారిత సేవలు, అభివృద్ధి చెందుతున్న సాంకేతికతలు, సెమీకండక్టర్లు, ఎలక్ట్రానిక్స్, అధునాతన తయారీ, లైఫ్ సైన్సెస్, బయోటెక్నాలజీ, ఏరోస్పేస్, గ్రీన్ టెక్నాలజీ, పునరుత్పాదక ఇంధనం, లాజిస్టిక్స్, పట్టణ మౌలిక సదుపాయాలు, పరిశోధన, అభివృద్ధి , నైపుణ్యాభివృద్ధి వంటి రంగాలలో సింగపూర్ సంస్థలకు ఉన్న పెట్టుబడి అవకాశాలను మంత్రి వివరించారు.
తెలంగాణలో ఉన్న పెట్టుబడి అవకాశాల గురించి సింగపూర్ ఆధారిత సంస్థలలో అవగాహన కల్పించాలని, భవిష్యత్తు పెట్టుబడులకు రాష్ట్రాన్ని ఒక గమ్యస్థానంగా పరిగణించేలా వారిని ప్రోత్సహించాలని కూడా శ్రీధర్ బాబు సింగపూర్ ప్రతినిధి బృందాన్ని కోరారు.
