న్యూఢిల్లీ : ఫిజిక్స్ వాలా వ్యవస్థాపకుడు అలఖ్ పాండే కీలక వ్యాఖ్యలు చేశాడు. ప్రతి బిడ్డకూ నాణ్యమైన విద్య ఉచితంగా అందాల్సిన అవసరం ఉందన్నారు. ఉచిత కోచింగ్ పథకం కోసం ప్రధాని మోదీ చేస్తున్న ప్రయత్నాలకు అలఖ్ పాండే ‘షరతులు లేని మద్దతు’ ప్రకటించారు. సమాన అవకాశాల కల్పన పట్ల తన నిబద్ధతను పునరుద్ఘాటిస్తూ తన ప్లాట్ఫారమ్ యొక్క నైపుణ్యాన్ని ప్రభుత్వానికి ఉచితంగా అందించారు. దీని కోసం ప్రభుత్వానికి నా సంపూర్ణ మద్దతును తెలియ జేస్తున్నాను. దీనికి ప్రతిఫలంగా నాకు ఎలాంటి లాభాలు వద్దు. భారతదేశంలోని ప్రతి బిడ్డకూ నాణ్యమైన విద్య ఉచితంగా అందాలి అని పేర్కొన్నారు. పోటీ పరీక్షల కోసం దేశవ్యాప్త ఉచిత ఆన్లైన్ కోచింగ్ కార్యక్రమాన్ని ప్రధాని నరేంద్ర మోదీ తన 80వ స్వాతంత్ర దినోత్సవ ప్రసంగంలో ప్రకటించిన నేపథ్యంలో ఫిజిక్స్ వాలా వ్యవస్థాపకుడు అలఖ్ పాండే కేంద్ర ప్రభుత్వానికి ఎటువంటి లాభాపేక్ష లేకుండా పూర్తి మద్దతును అందించేందుకు ముందుకు వచ్చారు. ఆయన ఎక్స్ వేదికగా స్పందించారు.
వాణిజ్యపరమైన ప్రయోజనాలను ఆశించకుండా క్షేత్రస్థాయిలో ఈ కార్యక్రమం సజావుగా అమలయ్యేలా చూసేందుకు తన ప్లాట్ఫారమ్ యొక్క సాంకేతిక , బోధనా సామర్థ్యాలను వినియోగిస్తానని పాండే హామీ ఇచ్చారు. తక్కువ ఖర్చుతో పరీక్షల తయారీకి సంబంధించిన సేవలను అందించడం ద్వారా తన ఎడ్-టెక్ ప్లాట్ఫారమ్ను నిర్మించుకున్న అలఖ్ పాండే ప్రధాని దార్శనికతకు స్పందించారు. క్షేత్రస్థాయిలో దీనిని విజయవంతంగా అమలు చేయడమే అత్యంత కీలకమైన అంశమని నొక్కి చెప్పారు. అవసరంలో ఉన్న విద్యార్థులందరికీ ఉచిత ఆన్లైన్ కోచింగ్ కల్పిస్తామన్న ప్రధాని హామీని నేను నిజంగా అభినందిస్తున్నాను. మారుమూల పట్టణాలు , గ్రామాలకు నాణ్యమైన విద్యను అందించడానికి ఆన్లైన్ విధానమే ఏకైక మార్గమని నేను ఎప్పుడూ నమ్ముతాను. ఇది క్షేత్రస్థాయిలో అమలు కావాలని నేను కోరుకుంటున్నాను, ఎందుకంటే అమలు అనేది ఇందులో ప్రధానమైన భాగం అని పాండే అన్నారు. సమాన అవకాశాల కల్పన పట్ల తన నిబద్ధతను పునరుద్ఘాటిస్తూ పాండే తన ప్లాట్ఫారమ్ యొక్క నైపుణ్యాన్ని ప్రభుత్వానికి ఉచితంగా అందించారు.
