అమరావతి : ఏపీ మాజీ సీఎం జగన్ రెడ్డి సంచలన వ్యాఖ్యలు చేశారు. ఆయన ఏపీ సర్కార్ తీరుపై మండిపడ్డారు. గత ఏడాది నిర్వహించిన డీఎస్సీలో అవకతవకలు జరిగాయని ఆరోపించారు. తక్షణమే కేంద్ర దర్యాప్తు సంస్థ సీబీఐతో విచారణ చేపట్టాలని డిమాండ్ చేశారు. అవకతవకలను కప్పి పుచ్చేందుకు సర్కార్ ప్రయత్నం చేస్తోందని మండిపడ్డారు. డీఎస్సీ-2025 ప్రశ్నపత్రం లీక్ , నియామక ప్రక్రియలో అవకతవకల ఆరోపణలు గుప్పించారు. ఈ వ్యవహారాన్ని ప్రభుత్వం నిర్వహించిన తీరుపై ముఖ్యమంత్రి ఎన్. చంద్రబాబు నాయుడిని జగన్ మోహన్ రెడ్డి ప్రశ్నించారు. మీ కుమారుడు నారా లోకేష్ ని కాపాడు కోవడం కోసం మీ ప్రభుత్వం ఎంతకైనా దిగజారుతుందా? అని నిలదీశారు. నిరుద్యోగ యువతకు, వారికి ఇచ్చిన హామీలను నెరవేర్చడంలో విఫలమైనందుకు మీ సమాధానం హింసేనా?” అని ఆయన అన్నారు.
డీఎస్సీ-2025 అవకతవకలపై సీబీఐ విచారణ కోరుతూ చేపట్టిన శాంతియుత రిలే నిరాహార దీక్షను టీడీపీ ఎమ్మెల్యే , అతని అనుచరులు భగ్నం చేశారని జగన్ మోహన్ రెడ్డి ఆరోపించారు. పోలీసుల సమక్షంలోనే టెంట్లు తొలగించారని, నిరసనకారులపై రాళ్లు, గుడ్లు, టమోటాలు విసిరారని ఆయన పేర్కొన్నారు. మాజీ ఎమ్మెల్యే మల్లాది విష్ణు , పార్టీ కార్యకర్తలపై కూడా దాడులు జరిగాయని ఆయన ఆరోపించారు. రాష్ట్రంలోని ఇతర ప్రాంతాల్లో కూడా నిరసనకారులపై ఇలాంటి చర్యలే జరిగాయని మండిపడ్డారు. స్వతంత్ర విచారణకు ఆదేశించడానికి ప్రభుత్వం ఎందుకు సుముఖంగా లేదని ప్రశ్నించారు. విద్యాశాఖ మంత్రి ఎన్. లోకేష్ బాధ్యత వహించడం, రూ. 9,000 కోట్లుగా పేర్కొన్న పెండింగ్లో ఉన్న ఫీజు రీయింబర్స్మెంట్ బకాయిల తక్షణ చెల్లింపు, అలాగే ‘సూపర్ సిక్స్’ పథకం కింద హామీ ఇచ్చిన నెలకు రూ. 3,000 నిరుద్యోగ భృతిని రెండేళ్ల బకాయిలతో సహా అమలు చేయాలని జగన్ మోహన్ రెడ్డి డిమాండ్ చేశారు.
