చెన్నై : తమిళనాడులోనే కాదు యావత్ ప్రపంచ వ్యాప్తంగా అత్యంత జనాదరణ పొందిన తమిళ నటులలో ఒకడిగా గుర్తింపు పొందాడు జోసెఫ్ విజయ్ చంద్రశేఖర్. ఆయన ఇప్పుడు సీఎంగా పని చేస్తున్నారు. అన్ని వర్గాల ప్రజల మన్ననలు పొందాడు. తాను నటించిన ఆఖరి సినిమా జన నాయగన్ పూర్తిగా రాజకీయ నేపథ్యం కలిగి ఉన్నది. ఇది ఎప్పుడో విడుదల కావాల్సి ఉంది. కానీ రాజకీయ కారణాలు, అభ్యంతరాల మధ్య చివరకు సెన్సార్ పూర్తి చేసుకుని త్వరలో ప్రేక్షకుల ముందుకు రాబోతోంది. ఈ సినిమా గురించి రోజుకో అప్ డేట్ వస్తోంది. ఇవాళ ఆసక్తికరమైన విషయం తెలిసింది. థియేటర్లలో విడుదలకు కొన్ని రోజులు మాత్రమే మిగిలి ఉండగా విజయ్ ఎంతో ఆసక్తిగా ఎదురుచూస్తున్న చిత్రం ‘జన నాయగన్’ అభిమానులలో ఉత్కంఠను రేకెత్తిస్తోంది. తాజా సినీ వర్గాల సమాచారం ప్రకారం, చిత్ర బృందం చివరి నిమిషంలో ఒక కొత్త పాటను సినిమాలో చేర్చినట్లు టాక్. దీనివల్ల విడుదలకి ముందు ఆసక్తి మరింత పెరిగేలా చేసింది జన నాయగన్.
నివేదికల ప్రకారం, ఈ కొత్త పాటను ఇటీవలే ఖరారు చేశారు. దీని ఉద్దేశ్యం గురించి చిత్ర బృందం అధికారికంగా ఏమీ వెల్లడించనప్పటికీ, ఇది ఒక ప్రత్యేక మాంటేజ్ సన్నివేశం కావచ్చు, విస్తరించిన నేపథ్య సంగీతం కావచ్చు లేదా ఎడిటింగ్ సమయంలో తొలగించి తుది వెర్షన్లో తిరిగి చేర్చిన పాట కావచ్చు అని ఊహాగానాలు వినిపిస్తున్నాయి. ఈ పరిణామంపై చిత్ర బృందం మౌనం వహించడంతో, కథలో ఈ కొత్త సంగీత భాగం ఎలా ఇమిడి పోతుందో తెలుసు కోవడానికి అభిమానులు ఆసక్తిగా ఎదురు చూస్తున్నారు. జన నాయగన్’ చిత్రానికి అనిరుధ్ రవిచందర్ సంగీతం అందించారు; దీనికి సంబంధించిన పాటలు ఇప్పటికే విజయ్ అభిమానుల నుండి సానుకూల స్పందనను పొందాయి. ఈ తాజా అప్డేట్ సినిమా విడుదలపై అంచనాలను మరింత పెంచింది.
హెచ్. వినోత్ దర్శకత్వం వహించిన ‘జన నాయగన్’, ఈ ఏడాది అత్యంత చర్చనీయాంశమైన తమిళ చిత్రాలలో ఒకటిగా నిలిచింది. రాజకీయాలపై దృష్టి సారించేందుకు సినిమాలకు దూరమయ్యే ముందు విజయ్ నటించే చివరి చిత్రం ఇదే కావచ్చని భావిస్తుండటంతో, ఈ సినిమాకు ప్రత్యేక ప్రాముఖ్యత ఉంది.
