Thalapathy Vijay: కోలీవుడ్ స్టార్ హీరో విజయ్ మరోసారి తన దాతృత్వాన్ని చాటుకున్నారు. ‘సౌత్‌ ఇండియన్‌ ఆర్టిస్ట్స్‌ అసోసియేషన్‌’ భవన నిర్మాణం కోసం కోటి రూపాయలు విరాళం అందించారు. ఇదే విషయాన్ని సినీ నటుడు విశాల్‌ తెలిపారు. ఈ సందర్భంగా కృతజ్ఞతలు చెబుతూ ‘ఎక్స్‌’ వేదికగా విజయ్ తో దిగిన ఫొటోను విశాల్‌ పోస్ట్ చేసారు. ‘థ్యాంక్యూ అన్నది కేవలం రెండు పదాలే కావొచ్చు. కానీ, హృదయం లోపలి నుంచి వచ్చే ఆ మాటకు విశాలమైన భావన ఉంటుంది. నా అభిమాన నటుడు, నాకు అత్యంత ఆప్తుడైన దళపతి విజయ్ కోటి రూపాయలు విరాళం ఇచ్చారు. నడిగర్‌ సంఘం భవన నిర్మాణం కోసం ఈ మొత్తాన్ని ఇచ్చినట్లు తెలిపారు. ఆయనకు ఆ దేవుడి ఆశీస్సులు ఎప్పుడూ ఉండాలి. మీ అందరికీ తెలుసు… మీ సహకారం, ప్రమేయం లేకుండా భవన నిర్మాణం పూర్తి కాదు. త్వరలోనే అది సాకారం కాబోతోంది. విజయ్ నిర్ణయం నాకు ఎంతో సంతోషాన్ని ఇచ్చింది’ అని విశాల్‌ ట్వీట్ చేశారు.
Thalapathy Vijay Donate
‘తమిళగ వెట్రి కళగం’ పేరుతో కొత్త పార్టీని ఏర్పాటు చేసి ఇటీవల రాజకీయాల్లో అడుగుపెట్టిన విజయ్… ఈ ఏడాది జరగనున్న సార్వత్రిక ఎన్నికల్లో పోటీ చేయబోమని ఇప్పటికే స్పష్టం చేశారు. అంతేకాదు ఇతర పార్టీలకు మద్దతు కూడా ఇవ్వబోమన్నారు. 2026లో జరిగే రాష్ట్ర శాసనసభ ఎన్నికల్లో బరిలోకి దిగుతామని వెల్లడించారు. ప్రస్తుతం విజయ్(Thalapathy Vijay) పార్టీకి సంబంధించిన గుర్తు, కార్యచరణ, విధి విధానాలపై కసరత్తు జరుగుతోంది. మరోవైపు వీలైనంత త్వరగా ఒప్పుకొన్న సినిమాలను పూర్తి చేసేందుకు శ్రమిస్తున్నారు. ప్రస్తుతం విజయ్…. వెంకట్‌ ప్రభు దర్శకత్వంలో సైన్స్‌ ఫిక్షన్‌ యాక్షన్‌ థ్రిల్లర్‌ ‘ది గ్రేటెస్ట్‌ ఆఫ్ ఆల్‌ టైమ్‌’ సినిమాలో నటిస్తున్నారు. విజయ్ ద్విపాత్రాభినయం చేస్తున్న ఈ సినిమాలో మీనాక్షి చౌదరి, ప్రశాంత్‌, ప్రభుదేవా, స్నేహా, లైలా ప్రధాన పాత్రల్లో నటిస్తున్నారు.
Also Read : Thalapathy Vijay : తమిళనాడులో ఒక సంఘ భవన నిర్మాణానికి 1 కోటి విరాళం అందించిన థలపతి