Sudheer Babu: యంగ్ హీరో సుధీర్ బాబు, మాళవిక శర్మ ప్రధాన పాత్రలో జ్ఞానసాగర్‌ ద్వారక దర్శకత్వంలో తెరకెక్కిస్తున్న సినిమా ‘హరోం హర’. ఎస్‌ఎస్‌సి (శ్రీ సుబ్రహ్మణ్యేశ్వర సినిమాస్) బ్యానర్‌పై సుమంత్‌ జి.నాయుడు నిర్మాతగా వ్యవహరిస్తున్న ఈ సినిమాలో సునీల్‌ ముఖ్య పాత్ర పోషించారు. ఈ సినిమాకి చైతన్‌ భరద్వాజ్‌ సంగీతమందిస్తుండగా.. అరవింద్‌ విశ్వనాథన్‌ ఛాయాగ్రాహకుడిగా వ్యవహరించారు. ఈ సినిమాని ప్రముఖ నటుడు కృష్ణ జయంతి సందర్భంగా మే 31న విడుదల చేస్తున్నట్లు గతంలో చిత్ర యూనిట్ ప్రకటించింది. అయితే అనివార్య కారణాలవలన ఈ సినిమా విడుదలను వాయిదా వేస్తున్నట్లు చిత్ర యూనిట్ ప్రకటించింది. దీనితో సినిమా వాయిదాపై తన బాధను వ్యక్త పరుస్తూ హీరో సుధీర్ బాబు(Sudheer Babu)… ఓ ఎమోషన్ పోస్ట్ పెట్టారు. ఇప్పుడు అది సోషల్ మీడియాలో వైరల్ గా మారుతోంది.
Sudheer Babu Movies
‘కొన్ని కారణాల వల్ల ఈ సినిమాను వాయిదా వేయాల్సి వచ్చింది. స్పెషల్ డేట్ మిస్ అయినందుకు చాలా బాధగా ఉంది. జూన్‌ 14న ప్రపంచవ్యాప్తంగా విడుదల చేయనున్నాం. కృష్ణగారి పుట్టినరోజు సందర్భంగా మొదట దీన్ని మే 31న విడుదలచేయాలని భావించాం. కానీ, ఆ తేదీ మిస్ అయినందుకు బాధగా ఉంది. అయినా.. జూన్‌ నెల నాకు చాలా కలిసివస్తుంది. గతంలో నేను నటించిన ‘ప్రేమకథా చిత్రం’, ‘సమ్మోహనం’ రెండూ జూన్‌లో ప్రేక్షకుల ముందుకు వచ్చి మెప్పించాయి. అలానే ‘హరోం హర’ కూడా మీ అంచనాలకు కచ్చితంగా అందుకుంటుంది’ అని సుధీర్ బాబు తన పోస్టులో పేర్కొన్నారు. 1989 నాటి చిత్తూరు జిల్లా కుప్పం నేపథ్యంలో సాగే చిత్రమిది. ఇందులో సుధీర్ కుప్పం యాసలో సంభాషణలు చెప్పనున్నారు.
Also Read : Ramayan : ‘రామాయణం’ సినిమాలో రావణుడిగా యష్ ధరించింది మొత్తం బంగారమా..?