Puspha 2::టాలీవుడ్‌ తో పాటు పాన్ ఇండియాలో రానున్న మోస్ట్‌ అవెయిటెడ్‌ సినిమాల్లో ‘పుష్ప: 2 ది రూల్‌(Puspha 2)’ ఒకటి. సుకుమార్ దర్శకత్వంలో ఐకాన్ స్టార్ అల్లు అర్జున్ ప్రధాన పాత్రలో తెరకెక్కిన సినిమా ‘పుష్ప ది రైజ్‌’… 2021లో విడుదలైన ఈ సినిమా బన్నీ కెరీర్ లోనే బ్లాక్ బస్టర్ సినిమాగా నిలిచిపోయింది. తెలుగులో ఈ సినిమాను తెరకెక్కించినప్పటికీ తమిళ, కన్నడ, మలయాళం, హిందీ భాషల్లో కూడా విడుదల చేయడంతో… ఈ సినిమా పాన్ ఇండియా సూపర్ హిట్ గా నిలిచింది. దీనితో ‘పుష్ప ది రైజ్‌’కు సీక్వెల్ గా వస్తున్న ‘పుష్ప: 2 ది రూల్‌’ సినిమాపై భారీగా అంచనాలు నెలకొన్నాయి. మైత్రీ మూవీ మేకర్స్‌ సంస్థ నిర్మిస్తోన్న ఈ సినిమాను ఆగస్టు 15న ప్రపంచ వ్యాప్తంగా విడుదల చేస్తున్నట్లు చిత్ర యూనిట్ ఇప్పటికే ప్రకటించింది. దీనితో ఈ సినిమాకు సంబంధించిన టైటిల్ సాంగ్ ను చిత్ర యూనిట్ విడుదల చేసింది. ప్రస్తుతం ఈ పాట సోషల్ మీడియాలో ట్రెండింగ్ లో నడుస్తోంది.
Puspha 2:
ఇక టైటిల్ సాంగ్ విషయానికి వస్తే… ‘‘నువ్వు గడ్డం అట్టా సవరిస్తుంటే దేశం దద్దరిల్లే… నువ్వు భుజమే ఎత్తి నడిచొస్తుంటే భూమే బద్దలయ్యే’’ అంటూ పుష్పరాజ్‌ పాత్ర గుణగణాల్ని… తన శక్తియుక్తిల్నీ వర్ణిస్తూ ఆద్యంతం ఆసక్తికరంగా సాగిందీ గీతం. దీనికి దేవిశ్రీప్రసాద్‌ సమకూర్చిన మాస్ బాణీలు… చంద్రబోస్‌ అందించిన సాహిత్యం… నకాష్‌ అజిజ్‌, దీపక్‌ బ్లూ ఆలపించిన తీరు… విజయ్‌ పొల్లంకి, శ్రేష్టి వర్మల నృత్యరీతులు… అన్నీ చక్కగా కుదిరాయి. అలాగే పాటలో అల్లు అర్జున్ వేసిన షూ డ్రాప్‌ స్టెప్‌, ఫోన్‌ స్టెప్‌, ఛాయ్‌ స్టెప్స్‌ ప్రధాన ఆకర్షణగా నిలిచాయి. ఆఖర్లో రెండు చేతులతో తన గడ్డాన్ని సవరించుకుంటూ ‘‘అస్సలు తగ్గేదేలే’’ అని బన్నీ చెప్పిన డైలాగ్‌ సినిమాపై అంచనాలు మరింత పెంచుతున్నాయి. మైత్రీ మూవీ మేకర్స్‌ సంస్థ నిర్మిస్తోన్న ఈ సినిమాలో రష్మిక కథానాయిక. ఫహాద్‌ ఫాజిల్‌, సునీల్‌, అనసూయ తదితరులు ముఖ్య పాత్రలు పోషిస్తున్నారు.
Also Read:-Nagarjuna: ‘కుబేర’ సినిమా నుండి నాగార్జున ఫస్ట్ లుక్ రిలీజ్ !