Mega Star : టాలీవుడ్, కోలీవుడ్ అని తేడా లేకుండా రెండు చలన చిత్ర పరిశ్రమల్లో తనదైన ముద్ర వేసుకున్న నటి త్రిష. వర్షం సినిమాతో తెలుగు ప్రేక్షకులకు దగ్గరయిన త్రిష… నువ్వొస్తానంటే నేనొద్దంటానా, బుజ్జిగాడు, అతడు, స్టాలిన్, ఆడవారి మాటలకు అర్ధాలే వేరులే, కృష్ణ వంటి బ్లాక్ బస్టర్ సినిమాలతో సుమారు రెండు దశాబ్దాల పాటు టాప్ హీరోయిన్ గా కొనసాగుతోంది.
నలభై ఏళ్ళ వయసులో కూడా పొన్నియన్ సెల్వన్, లియో వంటి సినిమాలతో హీరోయిన్ గా తన క్రేజ్ ను కొనసాగిస్తోంది. అయితే విజయ్ సరసన లియో సినిమాలో నటించిన త్రిషను(Trisha) ఉద్దేశించి కోలీవుడ్ నటుడు మన్సూర్ అలీఖాన్ ఇటీవల ఓ ఇంటర్వ్యూలో చేసిన వ్యాఖ్యలు పెను దుమారాన్ని రేపుతున్నాయి.
Mega Star – మన్సూర్ చేసిన వ్యాఖ్యలపై త్రిషకు పెరుగుతున్న మద్దత్తు
నటి త్రిషపై మన్సూర్ అలీఖాన్ చేసిన వ్యాఖ్యలు దేశ వ్యాప్తంగా తీవ్ర చర్చనీయాంశంగా మారాయి. దీనితో పలువురు సినీ, రాజకీయ ప్రముఖులు ఆ వ్యాఖ్యలను ఖండిస్తూ పోస్ట్‌లు పెడుతున్నారు. దర్శకుడు లోకేశ్‌ కనగరాజ్‌, నటి రోజా, రాధిక, గాయని చిన్మయి.. ఇలా ఇప్పటికే కొందరు సినీ ప్రముఖులు వ్యాఖ్యలు ఖండిస్తూ త్రిషకు మద్దత్తు తెలుపుతున్నారు.
తాజాగా త్రిషకు మద్దతుగా మెగాస్టార్ చిరంజీవి(Mega Star) సోషల్ మీడియా వేదికగా ఓ పోస్ట్‌ పెట్టారు. ‘త్రిషపై నటుడు మన్సూర్ అలీఖాన్ చేసిన వ్యాఖ్యలు నా దృష్టికి వచ్చాయి. ఒక నటిని మాత్రమే కాదు… ఏ స్త్రీని కూడా ఇలా అనకూడదు. చాలా అసహ్యంగా ఉన్నాయి. వీటిని తీవ్రంగా ఖండించాలి. వక్రబుద్ధితో ఇలా మాట్లాడుతున్నారు. త్రిషకు మాత్రమే కాదు.. ఇలాంటి వ్యాఖ్యలు ఏ అమ్మాయి ఎదుర్కొన్నా.. నేను అండగా ఉంటాను’ అని పోస్ట్‌ చేశారు.
ప్రస్తుతం మెగాస్టార్ చేసిన ఈ పోస్ట్‌ వైరల్‌గా మారింది. మరోవైపు మన్సూర్ అలీఖాన్ వ్యాఖ్యలను జాతీయ మహిళా కమిషన్‌ సీరియస్‌గా తీసుకుంది. ఈ విషయాన్ని సుమోటోగా స్వీకరించిన ఎన్‌సీడబ్ల్యూ.. మన్సూర్‌పై కేసు నమోదు చేయాలని తమిళనాడు పోలీసులకు ఆదేశాలు జారీ చేసింది.
త్రిషతో రేప్ సీన్ మిస్సవడం బాధగా ఉందన్న కోలీవుడ్ నటుడు మన్సూర్ అలీఖాన్
ఓ ఛానెల్ కు ఇచ్చిన ఇంటర్వూలో కోలీవుడ్ నటుడు మన్సూర్ అలీఖాన్ మాట్లాడుతూ “గతంలో నేను ఎన్నో రేప్ సీన్లలో నటించాను. ‘లియో’ సినిమాలో అవకాశం వచ్చినప్పుడు త్రిషతో కూడా అలాంటి సన్నివేశం ఉంటుందని అనుకున్నాను. అయితే అలాంటి సన్నివేశం లేకపోవడంతో బాధగా అనిపించింది” అంటూ తన మనసులోని వక్రబుద్దిని బయటపెట్టాడు. దీనిపై స్పందించిన త్రిష… ఇలాంటి వారి వల్లే అందరికీ చెడ్డపేరు వస్తుంది, అలాంటి వ్యక్తితో నటించే అవకాశం రాకపోవడం ఆనందంగా ఉందంటూ ఆగ్రహం వ్యక్తం చేసారు.
Also Read : Kaathal-The Core: మమ్ముట్టి సినిమాను బ్యాన్ చేసిన అరబ్ దేశాలు !