Lucifer 2: వైవిధ్యమైన పాత్రలతో మలయాళంతో పాటు తెలుగు ప్రేక్షకులకు కూడా దగ్గరయిన నటుడు మోహన్ లాల్. లూసిఫర్, దృశ్యం వంటి సినిమాలతో పాన్ ఇండియా రేంజ్ లో క్రేజ్ తెచ్చుకున్న ఈ మలయాళ సూపర్ స్టార్… మంగళవారం తన 64వ పుట్టిన రోజును జరుపుకుంటున్నారు. దీనితో మోహన్ లాల్ పుట్టిన రోజు సందర్భంగా లూసిఫర్ సినిమాకు సీక్వెల్ గా తెరకెక్కిస్తున్న ‘లూసిఫర్2: ఎంపురాన్‌(రాజు కన్నా గొప్పవాడు)’ సినిమాకు సంబంధించి ఫస్ట్ లుక్ ను విడుదల చేసింది చిత్ర యూనిట్. ఇంటర్నేషన్ మాఫియా డాన్ అబ్రహాం ఖురేషి పాత్రలో ఉన్న మోహన్ లాల్ లుక్ ఇప్పుడు నెట్టింట వైరల్ గా మారుతోంది. లూసిఫర్ కు దర్శకత్వం వహించిన ప్రముఖ నటుడు, దర్శకుడు పృథ్వీరాజ్ సుకుమారన్… ‘లూసిఫర్2: ఎంపురాన్‌(రాజు కన్నా గొప్పవాడు)’ కు దర్శకత్వం వహిస్తున్నారు. ఈ సందర్భంగా మోహన్ లాల్ కు పుట్టినరోజు శుభాకాంక్షలు చెబుతూ లూసిఫర్ 2 పోస్టర్‌ను డైరెక్టర్‌, హీరో పృథ్వీరాజ్ సుకుమారన్ పోస్ట్‌ చేశాడు.
Lucifer 2 Updates
ప్రముఖ మలయాళ హీరో, దర్శకుడు పృథ్వీరాజ్ సుకుమారన్ దర్శకత్వం వహించిన చిత్రం లూసిఫర్. 2019వ విడుదలైన ఈ సినిమా రూ. 200 కోట్లు రాబట్టింది. దీనితో ఈ మూవీకి సీక్వెల్‌గా ‘లూసిఫర్2(Lucifer 2): ఎంపురాన్‌(రాజు కన్నా గొప్పవాడు)’ అనే టైటిల్‌ తో ఈ ఏడాదిలో విడుదల చేయనున్నారు. సీక్వెల్ కోసం మురళీ గోపి కథ అందించగా పృథ్వీరాజ్‌నే దీనికి కూడా దర్శకత్వం వస్తున్నారు. గతేడాదిలోనే షూటింగ్‌ కూడా ప్రారంభమైంది. ఈ చిత్రంలో మోహన్‌లాల్‌తో పాటు మంజు వారియర్, టోవినో థామస్ కీలక పాత్రల్లో నటిస్తున్నారు.
‘లూసిఫర్’లో స్టీఫెన్‌ గట్టుపల్లి అనే రాజకీయ నాయకుడిగా మోహన్‌లాల్‌ కనిపించాడు. అయితే, ఆయన రాజకీయ ప్రవేశానికి ముందు ఈ ప్రపంచాన్నే శాసించే మాఫియాకు అధినేతగా ఉంటారు. మాఫియా డాన్ అబ్రహాం ఖురేషి సాధారణ వ్యక్తిగా జీవితం ప్రారంభించి అంత స్థాయికి ఎలా చేరుకున్నాడు. రాజకీయాలకు ముందు ఆయన ఏం చేశాడు..? ఎందుకు రాజకీయాల్లోకి వచ్చాడు..? అనేది తెలియాలంటే లూసిఫర్2 వచ్చే వరకు ఎదురుచూడాల్సిందే. లూసిఫర్ చిత్రాన్ని తెలుగులో గాడ్‌ఫాదర్‌ పేరుతో మెగాస్టార్‌ చిరంజీవి రీమేక్‌ చేసిన విషయం తెలిసిందే.
Also Read : Vishal: ఓటీటీలోకి విశాల్ ‘రత్నం’ ! స్ట్రీమింగ్‌ ఎప్పుడంటే ?