Captain Vijayakanth: కోలీవుడ్ లో విషాదం నెలకొంది. ప్రముఖ సినీ నటులు, దేశీయ ముర్పొక్కు ద్రావిడ కళగం (డి.ఎం.డి.కె) అధినేత కెప్టెన్ విజయకాంత్ అనారోగ్యంతో మృతి చెందారు. జలుబు, దగ్గు, గొంతునొప్పితో నవంబర్‌ 18న చెన్నైలోని మియత్‌ ఇంటర్నేషనల్‌ హాస్పిటల్‌లో చేరిన విజయకాంత్(Vijayakanth) కు వైద్యులు ప్రత్యేకంగా చికిత్స అందించారు. విజయకాంత్ ఆరోగ్యం పూర్తిగా కుదుట పడటంతో డిసెంబర్ 11న మయత్ హాస్పిటల్ నుంచి విజయకాంత్ డిశ్చార్జ్‌ అయ్యారు. అయితే మరల శ్వాస తీసుకోవడంలో ఇబ్బందులు తలెత్తడంతో ఆయన్ను కుటుంబ సభ్యులు మరల మియత్‌ ఇంటర్నేషనల్‌ హాస్పిటల్‌లో చేర్పించారు. అయితే ఆయన ఆరోగ్య పరిస్థితి విషమించడంతో చికిత్స పొందుతూ గురువారం ఉదయం తుదిశ్వాస విడిచినట్లు ఆస్పత్రి వర్గాలు తెలిపాయి. ‘కెప్టెన్’ మృతిపట్ల ఆయన అభిమానులు, సినీ ప్రముఖులు దిగ్భ్రాంతికి గురయ్యారు. కోలీవుడ్ తో పాటు భారతీయ సినీ, రాజకీయ ప్రముఖులు కెప్టెన్ మృతి పట్ల సంతాపాన్ని తెలియజేస్తున్నారు.
Captain Vijayakanth – పోలీసు అధికారి పాత్రలో మెప్పించిన విజయకాంత్
విజయకాంత్ గా తమిళనాట సుపరిచితం అయిన ఈయన పూర్తి పేరు విజయరాజ్ అలగర్‌స్వామి. ఇనిక్కుం ఇలామై సినిమాతో కోలీవుడ్ లో అడుగుపెట్టిన విజయకాంత్… 20కు పైగా సినిమాల్లో పోలీసు అధికారి పాత్రలో ప్రేక్షకులను మెప్పించారు. తమిళంలో కెప్టెన్ ప్రభాకరన్ గా విడుదలైన చిత్రం… తెలుగు, హిందీ భాషల్లో డబ్బింగ్ చిత్రంగా మంచి విజయం సాధించడంతో అతనికి కెప్టెన్ విజయకాంత్ గా గుర్తింపు పొందారు. 1984లో ఆయన నటించిన 18 సినిమాలు విడుదలవడం విశేషం. పోలీసు అధికారిగా 20కి పైగా సినిమాల్లో కనిపించారు. ఆయన నటించిన ఆఖరి సినిమా ‘సగప్తం’.
రాజకీయాల్లో అడుగుపెట్టిన కెప్టెన్ విజయకాంత్
సినీమా క్రేజ్ తో రాజకీయాల్లోకి ప్రవేశించి విజయం సాధించిన ఎంజిఆర్, కరుణానిధి, జయలలితల ప్రేరణతో కెప్టెన్ విజయకాంత్… 2005 సెప్టెంబరు 14న దేశీయ ముర్పొక్కు ద్రావిడ కళగం (డి.ఎం.డి.కె) పార్టీని స్థాపించాడు. పార్టీ ప్రారంభించిన తరువాత 2006లో జరిగిన మొదటి ఎన్నికల్లోనే 10 శాతానికి పైగా ఓట్లు సాధించారు. 2011 ఎన్నికల్లో అఖిల భారత అన్నా ద్రవిడ మున్నేట కజగం (ఎఐఎడిఎంకె) తో పొత్తు పెట్టుకుని 41 స్థానాల్లో పోటీ చేసి 29 స్థానాల్లో పార్టీను గెలిపించుకున్నారు. అయితే అనారోగ్య కారణాలతో ఆయన ప్రస్తుతం ఇంటికే పరిమితమయ్యారు. పార్టీ బాధ్యతలను కోశాధికారి పదవితో సహా ఆయన సతీమణి ప్రేమలత విజయకాంత్(Vijayakanth) భుజాన వేసుకుని నడిపిస్తున్నారు.
పుట్టినరోజు సందర్భంగా కార్యకర్తలకు విజయకాంత్ దర్శనం
గత కొంతకాలంగా అనారోగ్యంతో బాధపడుతున్న విజయకాంత్‌ను కార్యకర్తలు అభిమానుల కోరిక మేరకు ఇటీవల ఆయన పుట్టిన రోజు సందర్భంగా దర్శనం కల్పించారు. పార్టీ కార్యాలయంలో జరిగిన తన జన్మదిన వేడుకకు విజయకాంత్(Vijayakanth) హాజరయ్యారు. అయితే, ఆయన ఆరోగ్య పరిస్థితిని చూసిన డి.ఎం.డి.కె కేడర్‌ కన్నీటి పర్యంతమయ్యారు. ఆ తర్వాత నుంచి ఇంట్లోనే విజయకాంత్ ఉంటున్నారు. ఈ పరిస్థితుల్లో ఆయనకు ఆరోగ్య పరంగా సమస్యలు తలెత్తడంతో నవంబర్‌ 18న చెన్నైలోని మియత్‌ ఇంటర్నేషనల్‌ హాస్పిటల్ కు తరలించి చికిత్స అందించారు. అతని ఆరోగ్యం కుదుట పడటంతో డిసెంబర్ 11న మయత్ హాస్పిటల్ నుంచి డిశ్చార్జ్‌ అయ్యారు. మరల ఆయన ఆరోగ్య పరిస్థితి విషమించడంతో ఆసుపత్రిలో చేరి… చికిత్స పొందుతూ గురువారం తుది శ్వాస విడిచారు.
Also Read : Salaar 6th day Collections : 2023లో అత్యధిక ఓపెనింగ్స్ కలిగియున్న చిత్రంగా సాలార్