Captain Vijayakanth: ప్రముఖ సినీ నటులు, దేశీయ ముర్పొక్కు ద్రావిడ కళగం (డి.ఎం.డి.కె) అధినేత కెప్టెన్ విజయకాంత్ మళ్ళీ అస్వస్థతకు గురయ్యారు. ప్రస్తుతం చెన్నైలోని మయత్ ఆసుపత్రిలో ఆక్సిజన్ సహాయంతో ఆయనకు చికిత్స అందిస్తున్నారు. జలుబు, దగ్గు, గొంతునొప్పితో నవంబర్‌ 18న ఆసుపత్రిలో చేరిన విజయకాంత్ కు వైద్యులు ప్రత్యేకంగా చికిత్స అందిస్తున్నారు.
నవంబరు 29న ఆయన శ్వాస పీల్చడంలో ఇబ్బందులు తలెత్తడంతో వెంటనే ఆయన్ని ఐసీయూ వార్డుకు తరలించి వెంటిలేటర్ పై చికిత్స అందించారు. కొన్ని రోజులకు కోలుకోవడంతో ఇటీవల ఆయన్ని రూంకు తరలించారు. ఈ నేపథ్యంలోనే దక్షిణ భారత సినీ కార్మికుల సమాఖ్య (ఫెఫ్సీ) అధ్యక్షుడు ఆర్‌కే సెల్వమణి, నటీనటుల సంఘం అధ్యక్షుడు నాజర్‌, నిర్మాత శివ ఆస్పత్రికి వెళ్ళి పరామర్శించారు. అప్పట్లో విజయకాంత్(Vijayakanth) ఆరోగ్యం బాగానే ఉందని త్వరలో అభిమానులను కలుసుకుంటారంటూ వారు ప్రకటించారు.
అయితే డిసెంబరు 9 (శనివారం)న విజయకాంత్… శ్వాస పీల్చడంలో ఇబ్బందులు తలెత్తడంతో మరోసారి అస్వస్థతకు గురయ్యారు. వెంటనే ఆయన్ని ఐసీయూ వార్డుకు తరలించి ఆక్సిజన్ సహాయంతో చికిత్స అందిస్తున్నారు. దీనితో ఆయన ఆరోగ్యం పట్ల అటు అతని సినీ అభిమానులతో పాటు డి.ఎం.డి.కె కార్యకర్తలు ఆందోళన చెందుతున్నారు.
Captain Vijayakanth – కెప్టెన్ విజయకాంత్ సినీ ప్రస్థానం
విజయకాంత్ గా తమిళనాట సుపరిచితం అయిన ఈయన పూర్తి పేరు విజయరాజ్ అలగర్‌స్వామి. ఇనిక్కుం ఇలామై సినిమాతో కోలీవుడ్ లో అడుగుపెట్టిన విజయకాంత్(Vijayakanth)… 20కు పైగా సినిమాల్లో పోలీసు అధికారి పాత్రలో ప్రేక్షకులను మెప్పించారు. తమిళంలో కెప్టెన్ ప్రభాకరన్ గా విడుదలైన చిత్రం… తెలుగు, హిందీ భాషల్లో డబ్బింగ్ చిత్రంగా మంచి విజయం సాధించడంతో అతనికి కెప్టెన్ విజయకాంత్ గా గుర్తింపు పొందారు. గత కొంతకాలంగా డయాబెటిస్ తో బాధపడుతూ నడవలేని పరిస్థితుల్లో ఇంటికే పరిమితం అయ్యారు. ఈ నేపథ్యంలో ఆయనకు మూడు వేళ్ళు తొలగించాల్సి వచ్చింది. అయితే ఇటీవల విజయకాంత్ కు అనారోగ్య సమస్యలు ఎక్కువ కావడంతో… కుటుంబ సభ్యులు అతడ్ని మయత్ ఆసుపత్రికి తరలించారు.
రాజకీయాల్లో అడుగుపెట్టిన కెప్టెన్ విజయకాంత్
సినీమా క్రేజ్ తో రాజకీయాల్లోకి ప్రవేశించి విజయం సాధించిన ఎంజిఆర్, కరుణానిధి, జయలలితల ప్రేరణతో కెప్టెన్ విజయకాంత్… 2005 సెప్టెంబరు 14న దేశీయ ముర్పొక్కు ద్రావిడ కళగం (డి.ఎం.డి.కె) పార్టీని స్థాపించాడు. పార్టీ ప్రారంభించిన తరువాత 2006లో జరిగిన మొదటి ఎన్నికల్లోనే 10 శాతానికి పైగా ఓట్లు సాధించారు. 2011 ఎన్నికల్లో అఖిల భారత అన్నా ద్రవిడ మున్నేట కజగం (ఎఐఎడిఎంకె) తో పొత్తు పెట్టుకుని 41 స్థానాల్లో పోటీ చేసి 29 స్థానాల్లో పార్టీను గెలిపించుకున్నారు. అయితే అనారోగ్య కారణాలతో ఆయన ప్రస్తుతం ఇంటికే పరిమితమయ్యారు. పార్టీ బాధ్యతలను కోశాధికారి పదవితో సహా ఆయన సతీమణి ప్రేమలత విజయకాంత్ భుజాన వేసుకుని నడిపిస్తున్నారు.
Also Read : Salaar Movie: సెన్సార్ పూర్తి చేసుకున్న ‘సలార్’