Senthil Kumar: టాలీవుడ్ లో తీవ్ర విషాదం నెలకొంది. ప్రముఖ సినిమాటోగ్రాఫర్ సెంథిల్ కుమార్ భార్య రుహీ మృతి చెందారు. కొంతకాలంగా అనారోగ్యంతో బాధపడుతున్న ఆమె సికింద్రాబాద్‌ లోని ఓ ప్రైవేటు ఆసుపత్రిలో చికిత్స పొందుతూ తుదిశ్వాస విడిచారు. వృత్తిరీత్యా యోగా ట్రైనర్ గా పని చేస్తున్న రూహీ… టాలీవుడ్, కోలీవుడ్ సినిమా వర్గాలకు సుపరిచితురాలు. పలు రాజమౌళి సినిమాలకు జాతీయ, అంతర్జాతీ అవార్డులు అందుకున్న సినిమాటోగ్రాఫర్ సెంథిల్ కుమార్ తో పాటు రూహీ… అవార్డుల ఫంక్షన్ లో తళుక్కున మెరిసేది. రూహీ మరణ వార్త తెలిసి టాలీవుడ్ ప్రముఖులు దిగ్భ్రాంతి వ్యక్తం చేశారు. ఆమె మృతి పట్ల సంతాపం ప్రకటించారు. మల్టిపుల్ ఆర్గాన్ ఫెయిల్యూర్ కారణంగానే ఆమె మృతి చెందినట్లు తెలుస్తోంది. హైదరాబాద్ జూబ్లీహిల్స్‌ లోని మహాప్రస్థానంలో శుక్రవారం ఆమె అంత్యక్రియలు నిర్వహించడానికి కుటుంబ సభ్యులు, బంధువులు ఏర్పాట్లు చేస్తున్నారు.
Senthil Kumar’s Wife No More
ప్రముఖ సినిమాటోగ్రాఫర్ సెంథిల్ కుమార్(Senthil Kumar)… జూన్ 2009లో రూహీని వివాహం చేసుకున్నారు. యోగా ట్రైనర్ గా రూహీకి మంచి గుర్తింపు ఉంది. భరత్ ఠాకూర్ యోగా క్లాసుల హైదరాబాద్ విభాగానికి కూడా ఆమె సారథ్యం వహించడంతో పాటు స్టార్ హీరోయిన్ అనుష్క శెట్టితో కలిసి పని చేశారు. దర్శకధీరుడు ఎస్ఎస్ రాజమౌళి డార్లింగ్ సినిమాటోగ్రాఫర్ గా సెంథిల్ కుమార్ కు గుర్తింపు ఉంది. ఈ నేపథ్యంలో రూహీ ఇటు టాలీవుడ్, అటు కోలీవుడ్ కు కూడా సుపరిచితురాలు. టాలీవుడ్‌లో సెంథిల్ కుమార్ దర్శకధీరుడు ఎస్ఎస్ రాజమౌళి సినిమాలకే ఎక్కువగా పనిచేశారు. టాలీవుడ్ లో సై, ఛత్రపతి, యమదొంగ, అరుంధతి, మగధీర, బాహుబలి: ది బిగినింగ్, బాహుబలి 2: ది కన్‌క్లూజన్, ఆర్ఆర్ఆర్ లాంటి సూపర్ హిట్ చిత్రాలకు సినిమాటోగ్రాఫర్‌గా పనిచేశారు. ఇటీవల ఆర్ఆర్ఆర్ సినిమాకు గాను హాలీవుడ్ క్రిటిక్స్ అవార్డు తన భార్య రూహీతో కలిసి సెంథిల్ కుమార్ అందుకున్నారు.
Also Read : Sundaram Master: ఆకట్టుకుంటోన్న ‘సుందరం మాస్టర్’ థియేట్రికల్ ట్రైలర్ !