Rishab Shetty: స్వీయ దర్శకత్వంలో తెరకెక్కించిన ‘కాంతార’ సినిమాతో పాన్ ఇండియా గుర్తింపు తెచ్చుకున్న కన్నడ హీరో రిషబ్ శెట్టి… ఓటీటీ సంస్థలపై షాకింగ్ కామెంట్స్ చేసారు. గోవా వేదికగా జరిగిన ఇంటర్నేషనల్‌ ఫిల్మ్‌ ఫెస్టివల్‌ ఆఫ్‌ ఇండియా (IFFI) లో పాల్గొన్న రిషబ్… ఫ్లాప్ అయిన ఓ కన్నడ సినిమాను ఓటీటీ సంస్థలు తిరస్కరించడంపై ఆగ్రహం వ్యక్తం చేసారు.
‘‘గతంలో ఎన్‌ఎఫ్‌డీసీ (నేషనల్‌ ఫిల్మ్‌ డెవలప్‌మెంట్‌ కార్పొరేషన్‌) ఫిల్మ్‌ బజార్‌లాంటి వేడుకల్లో ప్రదర్శితమైతే కన్నడ చిత్రాలకు రెవెన్యూ వచ్చేది. కొవిడ్‌ సమయంలో ఓటీటీ ప్లాట్‌ఫామ్స్‌ వినియోగం పెరగడంతో ఇప్పుడు ఆ పరిస్థితి లేదు. అయితే కన్నడలో తెరకెక్కిన ఓ కమర్షియల్‌ సినిమా అనుకున్నంత ఫలితం ఇవ్వకపోడంతో… ఓటీటీ సంస్థలు కన్నడ చిత్రాలన్నింటినీ తిరస్కరిస్తున్నాయి. అది చాలా బాధాకరం’’ అని అన్నారు. అయితే రిషబ్ శెట్టి(Rishab Shetty) కామెంట్స్ ఎందుకు అలా చేయాల్సి వచ్చింది… ఏఏ ఓటీటీ సంస్థలు కన్నడ సినిమాలను తిరస్కరిస్తున్నాయి అనేది నెట్టింట చర్చనీయాంశంగా మారింది.
Rishab Shetty- కన్నడ చిత్ర పరిశ్రమను వదిలిపెట్టే అవకాశం లేదు- రిషబ్
ఒక్క హిట్ తన ఖాతాలో పడగానే ఇతరుల్లా తాను కన్నడ చిత్ర పరిశ్రమను వదిలిపెట్టాలనుకోవడం లేదని నటుడు రిషబ్ శెట్టి స్పష్టం చేసారు. ‘కాంతార’ సినిమా క్రెడిట్‌ అంతా కన్నడ ప్రేక్షకులదేనని… ముందుగా వారు ఆదరించి విజయాన్ని అందిస్తే ఆ తర్వాత ఇతర భాషల్లో ఆ సినిమా డబ్‌ అయి విజయం సాధించిందన్నారు. ‘‘కాంతార’ తర్వాత నాకు ఇతర చిత్ర పరిశ్రమల నుంచి అవకాశాలు వచ్చాయి. కానీ, నేను వాటిని తిరస్కరించా. కన్నడ ప్రేక్షకులకు నేను ఎప్పుడూ కృతజ్ఞుడిని. కంటెంట్‌ బాగుంటే భాషతో సంబంధంలేకుండా ప్రేక్షకులు సినిమాలు చూస్తారు అని ఆయన అన్నారు. ఇది ఇలా ఉండగా 54వ ‘ఇఫి’ వేడుకలో ‘కాంతార’కు సిల్వర్‌ పీకాక్‌ అవార్డు దక్కింది. సిల్వర్‌ పీకాక్‌ అవార్డు దక్కించుకున్న తొలి కన్నడ చిత్రం ఇదేనని నిర్మాణ సంస్థ హోంబలే ఫిల్మ్స్‌ సోషల్‌ మీడియా వేదికగా తెలియజేసింది.
‘కాంతార’కు ప్రీక్వెల్ గా ‘కాంతార ఏ లెజెండ్‌: చాప్టర్‌ 1’
బాషతో సంబందం లేకుండా విడుదలైన అన్ని బాషల్లో సూపర్ హిట్ అయిన ‘కాంతార’ కు ప్రీక్వెల్ గా ‘కాంతార ఏ లెజెండ్‌: చాప్టర్‌ 1’ తెరకెక్కిస్తున్నట్లు చిత్ర యూనిట్ ప్రకటించింది. ఈ ‘కాంతార ఏ లెజెండ్‌: చాప్టర్‌ 1’ కు సంబంధించి ఇటీవల విడుదల చేసిన ఫస్ట్ లుక్ కు దేశ వ్యాప్తంగా మంచి రెస్పాన్స్ వచ్చింది. దీనిపై స్పందించిన రిషబ్… నా కొత్త సినిమా ‘కాంతార ఏ లెజెండ్‌: చాప్టర్‌ 1’ గురించి నేను మాట్లాడాలనుకోవడంలేదు. ప్రేక్షకులే దాని గురించి మాట్లాడాలి. టీమ్ అంతా పనిపైనే దృష్టిపెట్టాం అని అన్నారు.
Also Read : Kangana Ranaut: ఇందిర తో కంగనా రనౌత్ చిట్ చాట్ !