Puspha 2: టాలీవుడ్ తో పాటు పాన్ ఇండియాలో రానున్న మోస్ట్‌ అవెయిటెడ్‌ సినిమాల్లో ‘పుష్ప ది రూల్‌’ ఒకటి. సుకుమార్ దర్శకత్వంలో ఐకాన్ స్టార్ అల్లు అర్జున్ ప్రధాన పాత్రలో తెరకెక్కిన సినిమా ‘పుష్ప ది రైజ్‌’. 2021లో విడుదలైన ఈ సినిమా బన్నీ కెరీర్ లోనే బ్లాక్ బస్టర్ సినిమాగా నిలిచిపోయింది. తెలుగులో ఈ సినిమాను తెరకెక్కించినప్పటికీ తమిళ, కన్నడ, మలయాళం, హిందీ భాషల్లో కూడా విడుదల చేయడంతో… ఈ సినిమా పాన్ ఇండియా సూపర్ హిట్ గా నిలిచింది. దీనితో ‘పుష్ప ది రైజ్‌’కు సీక్వెల్ గా వస్తున్న ‘పుష్ప ది రూల్‌’ సినిమాపై భారీగా అంచనాలు నెలకొన్నాయి.
Puspha 2 Updates
స్వాతంత్య్ర దినోత్సవాన్ని పురస్కరించుకొని ఆగస్టు 15న ఈ సినిమాను రిలీజ్ చేస్తున్నట్లు ఇప్పటికే చిత్ర యూనిట్ ప్రకటించడంతో… అల్లు అర్జున్ అభిమానులతో పాటు సినీ ప్రియులంతా ఈ సినిమా కోసం ఆశక్తిగా ఎదురుచూస్తున్నారు. ఆగస్టు 15కు ఇంకా రెండు వందల రోజులు మాత్రమే మిగిలి ఉండటంతో… చిత్ర యూనిట్ ‘పుష్ప ది రూల్‌’ కు కౌంట్‌డౌన్‌ ప్రారంభించింది. దీనికి సంబంధించిన కౌంట్ డౌన్ పోస్టర్ ను సోషల్ మీడియాలో పోస్ట్ చేసింది. ‘‘200 రోజుల్లో పుష్పరాజ్ తన రూల్‌ మొదలుపెట్టనున్నాడు. ఆగస్టు 15న ప్రపంచవ్యాప్తంగా ఇది విడుదల కానుంది’’ అంటూ చిత్ర యూనిట్ సోషల్ మీడియాలో పోస్ట్ చేసింది. దీనితో నెటిజన్లు ఆనందం వ్యక్తం చేస్తూ… #Pushpa2TheRule హ్యాష్‌ట్యాగ్‌ ను జత చేస్తూ వరుస ట్వీట్స్‌ చేస్తున్నారు.
ఆర్య, ఆర్య-2 సినిమాల తరువాత సుకుమార్ – అల్లు అర్జున్ హ్యాట్రిక్‌ కాంబినేషన్‌ లో వచ్చిన సినిమా ‘పుష్ప ది రైజ్‌(Pushpa)’. రష్మిక, ఫహద్‌ ఫాజిల్‌, సునీల్‌, అనసూయ కీలక పాత్రలు పోషించిన ఈ సినిమానను మైత్రీ మూవీ మేకర్స్‌ పతాకంపై నిర్మించగా… దేవీ శ్రీ ప్రసాద్ సంగీతం అందించారు. అప్పట్లో శ్రీ వల్లి, ఊ అంటావా ఊ ఊ అంటావా, నా సామి పాటలు యూ ట్యూబ్ ను షేక్ చేయగా… ఎన్నో అంచనాల మధ్య విడుదలైన ఈ సినిమా బాక్సాఫీస్‌ వద్ద కలెక్షన్ల సునామీ సృష్టించింది. ఈ సినిమాకు గాను అల్లు అర్జున్ ఉత్తమ నటుడిగా జాతీయ అవార్డును అందుకున్నారు.
ఎర్రచందనం స్మగ్లింగ్‌ నేపథ్యంలో తెరకెక్కించిన ఈ సినిమాలో కూలీగా తన ప్రయాణాన్ని మొదలుపెట్టిన పుష్పరాజ్… ఎర్రచందనం సిండికేట్‌ను శాసించే స్థాయికి ఎలా వెళ్లాడనేదాన్ని దర్శకుడు సుకుమార్ చాలా ఆసక్తికరంగా తెరకెక్కించాడు. అయితే సిండికేట్ గా ఎదిగిన తరువాత పుష్పరాజ్ కు ఎదురైన ఇబ్బందులు ఏమిటి ? వాటిని ఎలా ఎదుర్కొన్నాడు ? అనే అంశాలతో ‘పుష్ప ది రూల్‌’ సిద్ధమవుతున్నట్లు సమాచారం. పుష్ప-2కు సంబంధించి ఇప్పటికే విడుదలైన అల్లు అర్జున్ పోస్టర్ అభిమానులను విశేషంగా ఆకట్టుకోవడంతో పాటు సినిమాపై అంచనాలను మరింత పెంచింది.
Also Read : Koratala Siva: సుప్రీంకోర్టులో కొరటాల శివకు చుక్కెదురు !