Hi Nanna: యువ దర్శకుడు శౌర్యువ్ దర్శకత్వంలో నేచురల్ స్టార్ నాని, మృణాల్ ఠాకూర్ జంటగా నటించిన తాజా బ్లాక్ బస్టర్ సినిమా ‘హాయ్ నాన్న’. వైరా ఎంటర్‌టైన్‌మెంట్స్‌ పతాకంపై మోహన్ చెరుకూరి, విజయేంద్రరెడ్డి తీగల, మూర్తి కె ఎస్ నిర్మాతలుగా వ్యవహరించిన ఈ సినిమాకు హేసమ్ అబ్ధుల్ వాహబ్ సంగీతం అందించారు. శృతి హాసన్‌, బేబీ కియారా కీలక పాత్రలు పోషించిన ఈ సినిమా గతేడాది విడుదలై మంచి విజయాన్ని అందుకుంది. ఓటీటీ రిలీజ్ తర్వాత గ్లోబల్ వైడ్ గా కూడా సినిమా ఆడియన్స్ ను అలరించింది. తండ్రీ, కూతురు సెంటిమెంట్‌ తో రూపొందిన ఈ సినిమా ప్రేక్షకుల మనసులతో పాటు ఇప్పటికే పలు అవార్డులను కూడా సొంతం చేసుకుంది. తాజాగా అంతర్జాతీయ వేదికపై మరోసారి సత్తా చాటింది. న్యూయార్క్‌లో జరిగిన ‘ది ఒనిరోస్‌ ఫిల్మ్ అవార్డుల్లో’ హాయ్ నాన్న ఉత్తమ చిత్రంతో సహా మొత్తం 11 అవార్డులను సొంతం చేసుకుంది.
Hi Nanna Movie Viral
ఈ విషయంపై దర్శకుడు శౌర్యువ్ ఆనందం వ్యక్తం చేస్తూ… ‘ఇంత ప్రతిష్ఠాత్మక అవార్డులను సొంతం చేసుకోవడం ఆనందంగా ఉంది. హయ్‌ నాన్న(Hi Nanna) కోసం మేమంతా పడిన కష్టానికి ఫలితమిది. ఈ సినిమాను ఇంతగా ఆదరించిన ప్రేక్షకులకు హృదయపూర్వక ధన్యవాదాలు. తారాగణం, సిబ్బంది సపోర్ట్‌ వల్లే ఇదంతా సాధ్యమైంది’ అన్నారు. ఉత్తమ నటిగా పురస్కారం పొందిన మృణాల్ ఠాకూర్ మాట్లాడుతూ… ‘ఒనిరోస్‌ ఫిల్మ్ అవార్డులను గెలుచుకోవడం చాలా థ్రిల్‌ గా ఉంది. నా కల నెరవేరింది. కథ బాగుంటే సినిమాకు ఎక్కడైనా ఆదరణ లభిస్తుంది. ఈ సినిమాలో నేను పోషించిన య‌ష్న పాత్ర జీవితమంతా గుర్తుంటుంది. చిత్రబృందంతో పని చేయడం గొప్ప అనుభూతినిచ్చింది’ అన్నారు.
‘హాయ్ నాన్న’ ఒనిరోస్‌ ఫిల్మ్ అవార్డుల్లో… ఉత్తమ చిత్రం, ఉత్తమ నటుడు, ఉత్తమ నటి, ఉత్తమ జంట, ఉత్తమ బాలనటి, ఉత్తమ దర్శకుడు, ఉత్తమ స్క్రీన్‌ప్లే, ఉత్తమ తొలి దర్శకుడు, ఉత్తమ సినిమాటోగ్రఫీ, ఉత్తమ సౌండ్‌ ట్రాక్‌, ఉత్తమ ఎడిటింగ్‌ల్లో విభాగాల్లో సత్తా చాటింది. హాయ్ నాన్న సినిమాను ఇంటర్నేషనల్ ఆడియన్స్ కోసం ‘హాయ్ డాడీ’ గా రిలీజ్ చేశారు. నెట్ ఫ్లిక్స్ లో అందుబాటులో ఉన్న ఈ సినిమా చూసి ఇంటర్నేషనల్ ఆడియన్స్ కూడా ఇంప్రెస్ అయ్యారు.
Also Read : Chiranjeevi : జనసేనకు మెగాస్టార్ చిరంజీవి 5 కోట్ల విరాళం